亂吹之商品

商品新世界
一直以來個blog都係貼d新聞居多，少有自己評論，一嚟自己世界同投資觀比起各高手差成兩皮，二嚟自己係寫作方面真係差都無倫，有時上文下理唔通，有時講左成大段嘢，原來係廢話。但係由今日開始，會開始多d寫自己嘅睇法，去練習自己思維方面嘅紋理，各位blogger可以隨便留言指點小弟，等我呢位後生仔學多一點。

琴晚國際油價曾經衝上接近113新高，紐約期油收110.x，金價自從破左850美元之後，係900 - 1000 美元入邊上下浮動。到左近排，國際資金從硬商品流入軟商品(米糧、咖啡、玉米等)，直接令到本己供不應求嘅農產品狂升，導至各國(尤其是發展中國家)CPI抽升，居民可支配收入下跌，造成社會不和諧。小弟試列出造成商品價格狂升之理由：

1. 美元弱勢 --- 美元由2007年九月減息開始己貶值不少，直/間接令到以美元報價之商品價格表面上急漲，同期歐元兌美元由1.36升到現在1.58，升幅42.65%，而紐約期油由74美元升至現在111美元，升幅50%，以歐元計紐約期油只升29.11%。

2. 各取所需 --- 各國需求有增無減，尤以發展中國家(中、印)增幅極為顯著。

3. 供應量不前 --- 沒有大油田開發，只有大油田發現，由開採到供應存在滯後效應。耕地減少、天氣反常、全球暖化、水資源短缺，導致農產品供應減少。

4. 投機活動 --- 太多資金跟風炒作，加上通脹預期是資金追入嘅催化劑，令商品市場火上加油。(石油期貨活動資金由2000年嘅90億美元大幅增加到現在2500億美元)

可以預見，高通脹並非短期內可以解決嘅問題，唯一快速方法可能係全球性衰退，兩害取其輕，所以Bernake本身嘅抗通張理倫己經喺今年一月暫時無左，至於幾時提翻，木宰羊！(最驚好似老董嘅金句：唔再提即係無左啦)