亂吹之後市

恒指今個禮拜重上24000，但成交平均有八百億，好多人都話而家係熊市二期玩反彈，以道氏理論計會反彈下跌幅度1/3 至 1/2，以32000點計跌到20500，共跌11500點，反彈1/3 = 3500或1/2 = 5750，即反彈目標為24000 - 26250。由此推斷，恒指剛進入反彈目標，可能隨時完成反彈，進入熊三。

以上只不過假設恒指係熊市，咁如果係牛市二期呢？咁就唔同講法。恒指由2003年86xx點升至上年32000，共升左23400點，以道氏理論計會跌上升幅度1/3 至 2/3，跌1/3 = 7800或2/3 = 15600點，16400 - 24200，咁而家咪脫離左牛市二期，進入牛市三期lor？

以上純粹老吹，其實好友會諗到第二段，淡友會諗到第一段，係市場上，每個人對消息同新聞都有bias，有d人會諗到好嘅一面，有d人會向壞個一邊諗。例如，中國搞節能減排，淡友會諗到資本支出多左，壓低profit，會沽之而後快；相反，好友可能會諗到汏弱留強，對於大企業會係利好，無左咁多小企業競爭，會趁低價入貨。股指係反應成個市場嘅人對唔同消息嘅演繹，所以一定會上上落落，好難一本通書睇到老(加息股指跌、減息股指升)，無時無刻都係要順應市場。

上面個段係我對於整個股市嘅感覺，對於個股，各位高手都係會強調「股價反映盈利」、或者買股不買市，我絕對係認同嘅！

至於第二季點睇，我呢個初哥真係無各界高手咁多經驗，不過我都想寫低比將來嘅自己睇，當做投資路上嘅一種回億錄！

1. 四月美國企業出第一季業績，估計金融類會差，市場己經反映左，對股市無乜刺激(除左比預期好之外，會有正面刺激)，但係若果非金融業都差嘅話，會係一個幾大嘅負面刺激(睇星期五嘅消費信心指數同入口貨值就明)，我諗一半好一半唔好，所以對美股同港股影响會越嚟越細。

2. 通脹係一個計時炸彈。全球受糧食價暴升同高通脹因擾，會阻礙經濟發展，尤以發展中國家及貿赤國家嚴重，要密切留意通脹，隨時係駱駝背上最後一根稻草。

3. 個人認為，若有股災，並非來自美國，而是受美國經濟於緩而受拖累嘅歐洲同各東南出口國(日本)，對上一次下跌，主要反映美國衰退憂慮，並未對歐日等國之放緩重視。君試想22/1之怒跌原因吧！

所以，小弟都係要兩手準備，以強股為中心，逢高換馬，分散為輔(股、rmb、bond、cash)。無論上升或下跌，都要諗定一套策略，勝算才大。