見底未？(Updated)

五窮、六絕己經應驗左，咁係唔係真係七翻身？

踏入七月，恒恉係第一個禮拜企係22000點以上，突破左下降通道，應該會反覆上升，點知係房利同房地美、再加埋INDYMAC嘅消息之下，再以裂口下跌落翻入去下降通道入邊，技術上嚟講，以一個黑武士打敗左三個白武士，後市向淡居多。(幾有故事味道)

回顧一月同三月，一月以法興事件「見底」，三月以貝爾斯登事件再一次「見底」，咁睇上去，每一次「見底」會以一件突發事件觸發，若係真嘅，咁今次再房事件應該會令到恒恉再一次「見底」。

我唔係先知，投資知識、資歷淺，係咁復雜嘅情況之下，高手都摸唔清下半年嘅情況，我就更加摸唔清，亦都所以無謂去估計恒恉及經濟走勢！我只不過想列出我覺得會影响到下半年市況嘅關鍵因素：

1. 中國上半年經濟數據出左，GDP+10.1%，CPI+7.1%，好多評論及報刊認為下半年宏調會局部放鬆，因為
A) 出口減速情況太快，會導致三頭馬急速拉動GDP下降，造成連鎖效應(出口下降-->投資下降-->影响消費情緒-->經濟硬着陸)
B) 股市同樓市情況可以用慘不忍睹嚟形容，有唔少中國人民係呢場資產回歸理性行動之下失去財產、信心，而中國政府亦都無再出手，始終內地投資大眾唔成熟嘅表現，好容易會造成社會不穩。(巴基斯坦)
C) 展望下半年CPI會逐步下降嘅假設下(基數較大、食品升幅有放緩之象、無天災嘅效應)，從緊貨幣政策有機會放鬆。
D) 奧運將至，一切從穩係領導人嘅共識！

不過有點擔心會唔會係真：
A) PPI 仲係上升緊，CPI回落仲係言之尚早。
B) 通張預期升溫。
C) 係熱錢仲係不斷流入之下，政策放鬆好難預計(貨幣政策應該唔會變動，可能會以財政政策推動GDP)
D) 後奧運效應
E) 最驚係惡性通脹(工資同物價互相追逐)

2. 美國個邊樓市仲係下跌緊，金融業唔知仲有幾多賬要撥備，中小銀行面對資金緊絀，應該會出現倒閉潮，強者越強，以大食小會不斷出現。
A) 除左樓貸，信用上好可能係下一個炸彈。
B) 國民信心下跌，美元下跌，兩者會令到美國市民消費減少，GDP有機係負。
C) 政府為左經濟，以有形之手干預市場，救經濟/股市之心路人皆見。(救唔救到就未知)
D) 大選效應，兩黨會不斷形造一切安好(2008年)，下一年就有D危。

3. 香港
A) 受中美因素左右，冰火兩重天。
B) 滙率弱，輸入型社會 ---> 通脹好受外圍影响(而家係高通脹)
C) 四大支柱，其中三支相繼無優勢，唯獨金融，但係有隱憂(人才，工資、租金)

4. 國際形勢
A) 歐美面臨滯脹，新興經濟體就通脹、資產膨脹
B) 中東局勢
C) 油價高企

硬係覺得有D嘢未提及，諗到再UPDATE!!