個人睇法(1)

都好耐無update個blog，一來因為無精神、二來無乜嘢想寫。

熊市由二零零七年十月尾到今日二零零九年二月尾，總共十六個月，比起過往歷史熊市嘅平均數十二個月多，即係呢個係一個非比尋常嘅熊市(超......駛鬼你講咩，係人都知呢個叫金融海嘯啦)，恒指由三萬二千點跌到一萬三千點，跌左大約六十個巴仙，若計及最低位(暫時)一萬零六百點，共跌約六十七個巴仙，比平圴跌幅大。

統計完，講完歷史，係時候講下嚟緊一年係點。每日吸收唔同資訊，聽到唔同聲音，又人話一萬六百點見左底，亦都有人話會到八千點，甚至有超末日博士話會見六千。我就當聽故仔咁，指數係點，我唔想去諗(除玩期指、指數warrant、指數期權外)，我淨係注視自己手持及watch list入邊嘅股票。要知道，指數同大部分股票嘅corelation可能係負相關、無關，公用股就係一例。通常大市跌，佢地都會靠穩、甚至上升。好似離題，呢一年世界無一地方可以避過美國輸出嘅影響，發達國家同弱勢國會陷入衰退，而新興國家嘅高速增長神話都會破滅，中國、印度等國點都要面對經濟增速大幅回落嘅現實。

1. 作為中心同世界經濟火車頭---美國，因為危機之源 --- 樓市未有跌穩嘅跡象，復甦係在遙遠嘅他方。係奧巴馬政府不斷注資入股市去發動呢個巨大嘅引擎，多少都會有一點點嘅反應，會反映係某一時間上嘅數據同股市上。相對於天文數字嘅損失(包括己實現同未實現)，所注入嘅資本可以講得個鷄碎咁多。市場嘅事市場了，要發生嘅始終會發生，只有一切回歸基本，平均，先可以講復甦。

2. 歐洲地區唔係太熟，不過可以講下嘅。受到東歐嘅影響，某d金融股會受拖累，而金融股係各大股市嘅比重都不輕，所以股指並不樂觀。至於經濟，當地因為歐盟關係，小國由於財力、歐盟、歐羅關係，唔可以隨隨便便咁救市，亦都係佢地嘅死症之一。至於德、法等大國，因為出口同工業佔佢地生產總值較大，而工會影響力大，會不斷救當地工業。而英國就主力救金融業，可想而知，經濟前景都係繫於美國。

3. 新興國家因為出口為主，而對家係無能力消費之下，經濟會被拖累。股指方面，除左因為經濟因素，亦都受資金回潮影響，會比發達國跌幅大，掉頭咁諗，將來上升嘅潛力都會高，唯一前提係要頂住個海嘯先。

4. 中東/資源國(好少講)方面，受原油由高位回落，之前計劃中同進行中嘅大計都會失去油金預算之下，無可奈可咁停落嚟，政府儲備又唔係多，變得相當不明朗。可幸嘅係佢地手上仲有油儲呢個咁好嘅條件，所以估計佢地係繼亞太區之後另一可以留意嘅！

下一篇應該會講下港股！