FEELING

今個星期，財經界最受人注目嘅應該係滙控u盤同青姐落淚嘅一幕。

自從滙控宣布左業績、調整股息政策同世紀大供股之後，報章、電台、blog界、甚至新聞(無記用超過十分鐘講滙控)嘅分析有如秋天落葉一樣，無處不在、多到嘔，本篇其實都想做其中一分子，但係明知自己無料，唔想係各大高手面前獻醜，所以都係講下自己感想就算。

1. 滙控同香港人有好深嘅情結。好多團體，強積金，個人賬戶入邊定必會以5仔坐陣作為收息/退休之用，佢嘅一升一跌關乎到香港嘅穩定。(聽人講有阿婆係星期一u盤見到咁大場面係銀行暈左)

2. 供股與否。無需同人比較，自己要想清楚幾點：a) 有無正現金流 b)滙控前途，即係會唔會好似citi咁變左疆屍銀行 c)若果今日有筆錢，你會否買滙控(以供股價計) d)你當初買佢嘅原因仲係唔係度定係己經變左

3. 分析當然要睇，但係唔好盲目去相信。一間咁大規模嘅國際大行，要好"切"底咁分析佢可以講係無可能，甚至連佢入邊嘅管理層、分析員、精算師又好，都可能對滙控並不能作出百分之一百而又客觀嘅分析，何況其他分析員。而我地作為散戶，對比佢地無論係人力同資源上都係蚊比同牛比，所有資料都係要透過年報去了解(仲要係四百幾頁，有幾多人可以讀完之後話自己明哂架？)，所以最緊要係唔同嘅分析入邊過濾，找出佢地嘅立論點係對與否，啱嘅咪用lor，錯嘅當笑話咁睇(好似某大行上演"今日嘅我打倒昨日嘅我"，真係好睇過連續劇)

投資並不是人云亦云，可以講係一個戰場，少數人先可以係呢個戰入邊搵到食。要有自己思想(無唔緊要，交下學費，透過反省、改進、訓練、行動，重覆又重覆，攞下經驗，日積月累會有)，膽大心細，遠望大環境，近觀個股，搵到自己嘅規律，相信一定可以係入邊生存。我自己都係一個初哥，零七年尾到而家都係重傷，但係唔會無左信心，亦都盡力吸取別人經驗(成功or失敗)，作為自己借鏡。