經濟理論 --- 加息(3)

其實呢個課題真係可以講幾日都講唔完，我再嘗試下點樣理清經濟、通脹、息口等嘅關係。
經濟同通脹有四個唔同組合：

• 高經濟增長 + 溫和通脹   (2009年至2010年上半年嘅中國)
• 高經濟增長 + 高通脹 (而家嘅中國)
• 低經濟增長 + 高通脹 (70-80年代嘅美國)
• 低經濟增長 + 低通脹(甚至負通脹) (2010年嘅美國)

投資環境(經濟增長率 - 通脹)最好嘅係 1，而3 係最差，所以係2008年尾至2009年嘅中國股票市場回報係相當高，相反，係滯脹(3)情況下，股票市場嘅回報好唔得去邊。

根據近來美國嘅經濟數據，經濟增長似有加速嘅跡象，而相對佢嘅通脹指標仲係徘徊係低位，開始由4進入1，所以呢幾個月美股強到無朋友。

而中國郤因高通脹嘅關係，會減慢經濟增長而出現GDP ~= CPI，甚至有跌入3嘅可能，所以A股同有中國概念嘅港股(尤其係國企指數)就如扶不起的阿斗咁，點都升唔起。

咁多年以來，各國政府都希望利用政策去做到1嘅情況，可惜嘅係維持唔到太長時間，始終市場/人為因素變化太多，好多時都係兩個極端之間循環，就是所謂嘅經濟周期。

2009年，中國掦言用四萬億投資去刺激經濟，加埋民間資本，總數超過二十萬億，造成2009-2010年中國嘅貨幣供應增速極高，令到中國係今日面臨高通脹；為左社會穩定和諧，便要用利率政策去減低通脹及投資意欲，寧願要一個稍為低嘅經濟增長(~7-8%)及溫和通脹(<3%)。

由於實體經濟回落會先於通脹(投資減少 ---> 企業盈利減少、消費需求回落 ---> 供不應求轉變為供需平衡再轉為供過於求 ---> 通脹回落)，回報會係一開始時有所減低。

但當通脹有所回落，情況會慢慢轉移到4。

係呢個時候，政府見減低通脹有成效而經濟有點不振，便開始轉變政策，由緊入鬆，正如現在美國般。

正如前所述，經濟會1->2->3->4咁循環不息。而息口會因應經濟同通脹係邊一個情況下而作出調整。

而若果再加埋同股市嘅關係，就更加更加復雜。

Posted in: 經濟