經濟理論 --- 加息(2)

比多一個概念先：

唔同資產會有唔同嘅風險，係比較唔同資產嘅回報吸引力時，要計埋當中所受嘅風險程度。市場一般價將美國三十年國債息率定為無風險利率(risk free rate --- RFR)(以前可能好穩陣，因為唔相信美國會賴債，但今日其實已經係超錯)，股票嘅風險較高，所以要求嘅回報(股票市場嘅息率)會係無風險回報上加一個溢價；溢價幾多就好視乎市場對股票/經濟前景嘅睇法，樂觀時可以係負溢價(皆因除左息之外，仲可以係資本增值，兩者加埋會高過RFR)，悲觀時溢價會好高(息口要計埋資本減值幅度)。

其實以上所講嘅咪係所謂機會成本概念。

>>>姐係當通脹嘅時候, 政府就加息, 收緊銀根, 而當消費支出指數低嘅時候, 政府就減息, 減少市民開支

好啦，講翻你嘅問題。

或者咁講你可能會易理解：

1. 加息，通常都係存貸息都加；
2. 加存款利息，咁相對其他資產上嘅投資價值會上升，因為息多左，咁某部份資金會由其他資產流入銀行存款
3. 當中資金有普通市民嘅資金，亦都有企業本來用嚟投資嘅資金
4. 而加貸息，其實係增加左投資成本，對於企業嚟講，回報少左(甚至負)，自不然會減低投資興趣，寧願將資金泊落銀行、國債等收取風險少一點嘅工具。
5. 兩者都會將流動係市場嘅資金減少，m 同 v 同時下跌，p 理論上自然會回落。
6. 但同一時間，太高息會令經濟失去動力(因投資落實體經濟上嘅資金少，自不然會減少器材、買地起工廠、減少人手等)，經濟有很大可能會掉頭回落。

好啦，正如你所講，若消費不振，投資意欲不大兼有閒置產能時，經濟唔荒好，呢個時候政府就要運用貨幣同財政政策去刺激經濟：

1. 減息：a) 存款、國債等嘅回報減少；b) 融資成本減少；兩者都會將資金由銀行體系抽離，進入市場(m 及 v 上升)
2. 增加政府開支：由於減息效應有滯後性，短期嘅投資空缺要由政府擔任，務求做到短時間增加需求而帶動投資上升/降低閒置情況
3. 但由於呢d政策由開始到見到成效係要時間，市場對企業盈利未感到樂觀，反映在股票市場上；
4. 減息幅度要到咁上下(~2%)先會驅使更多資金抽離銀行體系；

所以一開始減息會對資產市場不利。

而減息一段時間後(幾耐就視乎經濟有幾差啦)，由於增加嘅資金會投資於實體經濟(買器材、工廠、請人)，並沒有多餘資金去炒呢樣炒個樣，所以通脹一般嚟講係溫和(由基本需求帶動)。就業率上升下，消費回升，導致企業盈利跟隨上升，股市都會提前反映而上升。

到後期，資本市場回報大過實體投資，資金會相繼進入資本市場去炒炒炒，咁通脹會開始拋物線咁上升，對於企業盈利會不利(原材料上升，一時間成本未能完全轉嫁到消費者身上，要硬食)，咁又循環到加息調控經濟過熱、通脹升溫嘅階段。

Posted in: 經濟