追？

前幾日入左941，入貨價為79，而家坐緊艇（第一次入佢）！好多人話佢嘅增長神話不再，淪為公用股，甚至有人話佢係中國版8號仔！（comment下次再講，要組織一下）

941而家面對唔少「劣勢」，例如政策傾斜、中聯通同中電信嘅競爭、3G嘅開發資金需求及難度/普及度，所以半年嚟都跑輸恒指

由佢嘅中期業績，好多評論都總結出增長神話不再，淪為公用股。當市場中有咁嘅共識，無論佢有咩動作(入股台灣電訊、出o-phone、或i-phone等)，都唔會對佢有太大嘅幻想、希望，被人冷落一旁。當恒指站在21500以上，滙豐重上90，700同1211升到無朋友時，偏偏佢升就無佢份，跌就陪住跌，人地升佢獨跌，成為拖住大市嘅負累，咁點解我會買入呢？ 

好簡單，現價唔貴。p/e 12 倍，比起其他股動不動2x-6x倍p/e，可以講平；另一點，雖然增長漸趨放緩，但係叫做穩定，息率3.5%，係利率低嘅環境底下，可以做到保持現金購買力！(真係公用股性質)，但想對於公用股，佢仲有一個特點：業績可能會有驚喜。現在主力3G開發，當到一定開發程度，設備方面投資會減少、收入相對純語音通訊會增加不少，這時利潤會再一次重入上升期。當然，呢d可能係我一廂情願/痴人說夢話，但我只當一個bonus！

講翻近期心法，看著恒指進三步、退半步咁升，但自己倉內組合就原地踏步/跑輸，唔多唔少都會對自己投資睇法有質疑，是否自己選股方面有問題？或是某些資料看漏？想法上偏向一方面，沒有考慮到其他方面？真係好困惑。心大心細，究竟應該追貨或是不動觀察為上？每天自己都會問這個問題，但自己真係答唔出，因為真係搵唔到一個好強勁嘅理由去說服自己入貨，所以都係以不行動作為近期嘅行動，當然，若心中目標股票有好價位會逐少、逐少咁買入，始終係上升市，一鳥在手總好過兩鳥在林！

目標股為內需、政策股，而家好多都唔平、甚至有點兒貴。現價唔會買，隨非有咩特別消息令佢價值有所調整，否則，觀察為主。