危機感

1. 五月二十五同五月二十六日，五月16600 put 分別有498同437張long倉開左。琴日嘅升市話比大家知，淨係呢935張option己經蝕左太約935*50*1000 = 四億六千幾萬，即係大戶同大戶鬥，無散戶份。財富轉移急速進行中。

2. 滙控減存款息，似擺款多過想為盈利；hibor創新低；銀行結餘成二千五百幾億；各大行轉軚睇好樓、股等實物資產；游資充斥市場；各人焦點由通縮轉為通脹；一切一切都暗示--->資金市，令到樓、股、商品等實物資產作出非理性嘅上升：

a) 恒指係短短三個月由113xx升到琴日嘅178xx，升左6500點，幅度達57.5%！

b) 地產商嘅新樓盤買過滿紅，今朝睇新聞，新開盤位於馬鞍山嘅銀湖．天峰一晚售出400個單位！

越多呢類消息，我嘅危機感就越強：

1. 樓市一般都係滯後指標，但目前經濟未回穩，點解會同經濟decouple？

2. 非理性嘅升市(但唔係話乜經濟差，股市點會好嘅「阿媽係女人」理論)，可以睇以下幅圖，

同07年直通車概念比，白色線嘅斜度同由今年三月到而家為止嘅斜度居然係平衡，可以話今次升得同個次一樣：升到你唔信，亦都唔比你追得到；試問有幾多散仔係今次升浪食盡？

3. 有些常看嘅blogger 都開始相繼停手、又或者出下貨、再唔係就做hedging！

呢排腦入邊諗緊d嘢，但係出唔到結論：

1. 美國嘅意圖：又想美元貶值嚟撐住出口，又想強美元嚟搵水魚食佢d債

2. decouple：上次97亞洲金融風暴，亞洲國家受傷極深，但西方國家繼續繁榮；今次西方國家受難，亞洲國家相對只係輕傷，會唔會出現economy decouple？但係亞洲國家經濟係連繫住西方國家，主人有難，做下人(雖難聽，但係事實)嘅會唔會無糧出？靠自己夠唔夠食？

3. 中國經濟真空期：三頭車馬，兩頭(出口、固投)死火，剩下一頭(內需)，撐唔撐得起中國需要嘅經濟增長幅度？四萬億資金夠唔夠呢？中國係可以再加碼，但到唔到位呢？到呢一刻為止，中國政府嘅資金都係落係大國企身上，相反主導經濟發展嘅中、小企業仍然係水深火熱中，二元經濟幾時好呢？

4. 香港嘅前途：四大行業得翻金融可以講有優勢，但一連串嘅醜聞(迷債、私有化)將呢個優勢打左個折，若再不思進取(又唔搞好債券市，迷於衍生市)，又玩特別嘢(伊斯蘭bond、商品)，可以大膽預言，莫講話上海，星加玻都可以威過你！

5. 資金嘅出路：港幣可以講遲早會unpack美元，到左rmb滙兌自由，港幣可以消失，而家購買力不斷下降嘅情況之下，想安全保護購買力，應該點做？