再短評

社會

1. HIN1 個案增速有加快情形，而當中都有一、兩單危殆個案！有藥物治療唔係話可以忽視，需知道流感嘅變種能力強，加上藥物會程現效力消減作用，做好預防行為才是上策。

2. 自願驗毒計劃，可以話唔驗，而家話家長要尊重私隱，可能唔知結果，咁驗嚟估乜？成效又有幾大？控制源頭先係治本。

3. 醫療事故又發生。係制度問題，公院唔夠人手，但超負荷嘅運作之下，出現錯誤係正常！點樣去改善，單靠強醫金絕對唔得，應該係公私合作，將有能力嘅人轉介去私院，公院只提供基本需要。教育上亦都要進行微調，唔係乜事都打999去急症室！

經濟

1. 半個月嚟港滙有少少轉弱，同期亞洲市場同歐美市場強弱情況明顯，估計係資金轉向歐美市場。

2. 歐美數據多有穩定回升之象，但個人認為係有形之手下嘅必然現象，要經濟回覆增長，好視乎私人投資情況，股市上己先行反映樂觀情緒，亦都係 1 嘅原因。

3. 歐美消費力下降，環球貿易減少，貿易保護抬頭，要密切留意。

4. 中國要動態微調，確保資金進入實體經濟，令到政策個效率能夠放大。

5. 業績期，留意邊d係人、邊d係鬼、邊d係半人半鬼、邊d係準備投胎做人、邊d係.....

個人

1. 懶左兩個月，要重新起動，目標 a) ko 之前買落嘅書 b) 學車

2. 抽離左一個多月，回看自己操作，真係好差。學嘅、睇嘅都係好多好多，但無樣精，有d仲係半桶水，所以要實現長遠目標，呢種投資系統只會令自己三陣出局。而家要做嘅係喺其中抽一、兩種作為主要系統架構：a) 專注個股 b) 大市情況作輔助

對自己之前操作嘅反省

就如一般初學者一樣，自己都經歷過貪婪同恐懼時間，下跌時想跌多點去估底，到大恐慌時郤o 哂咀，終於知道咩叫「講就無敵、做就無力」。一路以來，無論做咩事都好(除左計數)，對自己嘅睇法都無信心。何解呢？例如中學時嘅discussion，自己嘅觀點自己都有點懷疑，何況人地，所以通常都係比人ban 到不知所謂，分數叫做拉車邊合格。原因其實唔多唔少同自己睇嘢太窄、個人傾向保守有關。大路嘢係人都會講，分野在於點樣去elaborate，去提出獨特見解，自己偏偏缺少左呢點(其實唔係無，只不過過於表面，正所謂捉到鹿唔識脫角)。出到嚟做嘢好、投資好，呢樣缺點大大影响自己表現。另一點，係唔敢去錯。例如投資，明明計好現價係物有所值，但因為怕自己睇錯(即gramham 所講嘅理解不足)輸錢而無操作，錯過左機會，仲唔止一次，係重覆犯錯，所以現在正搵緊方法去克服呢個心理障礙。仲有嘅係走精面心態，呢樣嘢係出左嚟做嘢之後先陪養出嚟，(又要馬兒跑，又要馬兒不吃草，世界上邊有咁著數嘅嘢！)所以無論係事業、財富等都係停滯不前。工作上想上位，但就點都無盡力做好自己，本份會做得足，但就唔會上心；投資上，理論多而雜，無核心系統/架構，間接令到操作上失誤居多，成績一目了然 --- 見紅(唔係國內個隻紅)。因此，而家要做嘅係上面個人嘅第二點，理順自己心法，摸出自己睇法/觀點，若然發覺無信心，要多作資料搜集去support 或 反省係唔係真係錯左。對大眾意見持懷疑態度，以眼見為實才信。

講住咁多先，應該會月度回顧！

Read more »

短評

距離上次寫blog剛好一個月，呢個月無買賣操作，每日都去update下新聞，同留意自己心水股票。上個星期開始，內地公司發佈業績，自己組合入邊除左奧思同soho之外，其餘都公報左！自己粗略咁睇左佢地份業績，比下評價：

1. 滙控：三分天下變成著重歐亞地區，公司會著重發展中國同亞洲業務；美國業務方面撥備見頂，而規摸都慢慢減少；歐洲情況無想象同傳言中咁嚴峻，但難以確保會有突發性事件發生，因為歐洲銀行相對美銀行係次按嘅再爆發率高！中國方面，講左會係a股上市，亦都大力發展內地業務(銀行及壽險)。估值唔平唔貴，等下半年業績！

2. 思捷：業績無論係同比定環比都差左，比人洗倉係理所當然，加上新管理層未摸熟公司，對下半年嘅整合會帶來唔少挑戰。而主要營業地區嚟講，呢幾個月消費信心、景氣指數都開始回升，對行業整體都好嘅，但唯一擔心嘅係佢能唔能夠化為利潤！定住比以前模糊，而高思漢都講出唔係太睇好下半年，所以無咩期望！會繼續渣住呢少少，當交學費！

3. 瑞房：公報利潤下跌~37%，但自己計過唔計會計制度同出售股權嘅影响，純利下跌~22%；主因係成本高左好多，睇過其他有關公司嘅業績，似乎係行業因素多過公司本身！內地房地產市場今年都幾熱，荒間都話有泡沫！但我咁睇，一個每年以高單位或低雙位數字增長國家嚟講，房地產市場增長速度一定比起發達國家高，亦都唔多唔少會有泡沫現象，就好似八、九十年代嘅香港一樣；經過08年嘅大幅下挫，內地官員係調整政策上會較為傾向鬆下緊下，務求做到「有保有壓」，始終房地產係中國人民財產嘅大部分，政府係和諧社會目標下，唔會做得太絕！而瑞房物業主要喺上海、成都、重慶等重點發展城市，地理上己經佔優，再加上佢嘅商業模式及10同11年嘅物業情況嚟睇，我會搵機會增持！

4. 中國銀行：環比業績冠絕六行，而貸款大增情況之下，抵消左息差因素，半年純利只下跌~2.5%，其中利息收入滅少8%。而旗下中銀香港都回歸正當盈利水平。貸款增速相對較快，令到貸存比上升！現價唔係貴，係六行入邊最平個隻，但無意思增持！

5. 招商銀行：同同業比，一個字----差！環比都仲係倒退，最唔滿意嘅作成本收入比上升到>40%，唔知係唔係同香港d人工高有關！淨息差同淨利息收益係六行入邊唯一多過100點子，而係貸款增長超過30%之下，淨利息收入才下跌23%咁大巴！唔好同四大行比，係七大股份制銀行入邊都係最差嘅(http://big5.xinhuanet.com/gate/big5/news.xinhuanet.com/fortune/2009-08/29/content_11962825.htm)。對佢好失望，唔知星期一點比人洗倉啦！睇嚟要搵定目標換馬！交行？建行？其實最想嘅係浦發！

6. 中國人壽：利潤同比增15.6%，己實現保費收入增加11%，最亮麗嘅係新增業務價值增加35%以上，重質又重量！內地經濟回穩之下，會受惠！市場唔係傻，現價係fair，待機增持或以分批模式增持，目標係倉內最大比重！

Read more »

反網絡暴力宣言

—————————————————–反網絡暴力宣言—————————————————–
* 互聯網是自由媒介，所有網民都享有言論和思想自由，不容干涉。
* 思想和言論自由，是香港社會的基石。網上網下，我輩都有責任好好維護這個權利。
* 反對一切防礙網絡自由的行為，包括：
1। 壓制甚至禁止反對意見
2। 利用軟/硬手段，甚至恐嚇，去令反對聲音消失。
本人對網絡暴力行為深表遺憾，故貼此宣言，希望網上的言論自由和人身安全，得到保障。原文出處在這裡希望小小的聲援一下，不是針對個人，而是，言論自由對社會好重要。

Read more »

出手

買入奧思(1161)，買入原因：

1. 受經濟周期影響較少

2. 積極發展內地業務，有內需概念

3. 技術上接近三月低位，而息率吸引，防守性高

Read more »

市場實況(2)

差唔多兩個禮拜無更新博客(部落格)，今個月嘅焦點：

1. 新股熱潮

2. 美國企業業績公報期

3. 中國半年經濟數據

美國企業業績

1. 第二季股市上升，經濟數據有好有唔好，令到某些企業受惠，另一些企業挨打，市場對標普第二季業績同比下降35%。

2. 今個星期，高盛、摩通、美銀、citi、IBM等業績都好過預期，唔多唔少都會令到分析員對未來企業嘅業績有好嘅期望；雖則GE、GOOGLE、DELL等都差過預期，但市場無視之，繼續我行我素。

3. 今次想討論下高盛嘅業績。自從五大投行到兩大，再變身做商行，高盛嘅市場分額提升不少。亦令到佢第一季同第二季中嘅業績令人喜出望外。但細節有無魔鬼呢？

a) 投資業務增幅驚人，尤以自身交易為甚，而VAR亦都相對上高，係第一季同第二季股市同債市嘅表現嚟講，呢方面其實係可預視到嘅，只不過係做唔到咁勁啫！

b) 呢排講得好"恒"嘅PT(程式買賣)，原來高盛係佔去紐交所一半至百分之六十嘅份額，所以有言論講佢係度控制市場咁喎(其實諗嘅方向正確，睇本周嘅市場己經知，後補)，有研究表明，PT嘅年利潤為21 billion，而紐交所佔去其中嘅百分之三十。換言之，高盛當中嘅利潤估計為3-4billion。

c) 上述嘅利潤資金其實係由美國tax paryer 而來，可以講話無本生利。

d) 若果要季季都咁有錢賺，你係高盛會點做？小弟即刻諗到嘅係要市場大幅上落，唔係牛皮市點玩呀？

4. 另，新屋動工數字出左，按年率計升3.6，係海嘯後新高。表面上睇樓市有轉好跡象，但睇真下，個estimate error 係 +/- 11.3%，個range 咁大，玩哂啦！

嚟緊仲係美國嘅業績潮，頭炮咁強，唔多唔少都會影響到市場對後尾嘅期望，希望唔好演變成希望越大、失望越大！

(待續....)

Read more »