2010 回顧

趁今日唔係咁凍，隻手無咁不受控制下做下2010回顧。

投資篇：
睇翻每月回顧，都幾汗顏。

當中買入同買出原因真係得個講字，買入時睇好，賣出時睇淡，同阿媽係女人有咩分別？

最最最容易睇到嘅錯處有二點：
1. 無耐性
2. 溝淡

首先無耐性：

• 408 (in 6.4/out 6.2)
• 2018 (in 13/out 13.4)
• 522 (in 72/out 68.2)
• 2369 (in 3.8/out 3.62)
• 2398 (in 4.74/out 4.85)

睇翻佢地而家嘅股價，真係一殼眼淚。好明顯，以上嘅操作係違反左價值投資概念，基本因素無跡象變差下郤因震倉或小利而賣出，失去左之後可觀嘅升幅，輸錢係祗嘅。

第二，溝淡：

• 1211 (in 70.9, 74.95, 67.2/out 50.5 x 2)

呢次溝淡加賣出行為比左好大教訓自己，亦都大大影响左2010嘅回報。我有以下總結：

1. 未經深入調研企業絕對絕對唔係因為乜乜效應而買入，因為一定係無信心持股，好易比人震倉。
2. 唔係話一定唔溝淡，但前提係要對企業內在值有一個了解，知道咩價位係可以溝，咩位係唔可以。
3. 止蝕位要係買入前定，亦都要堅持執行，唔係等了又等，唔係正如而家個一手比亞迪般 --- 等回鄉！！

仲有一隻超吉大肶嘅2010股王與我無緣，佢就係六福 (我買係價係8.04，賣價係9.5，若持有到而家，係兩倍股呀.............，好經典嘅贏粒糖)

當然，今年都有一、兩次交易係叫做正確的，但我唔認為是自己嘅能力，反而幸運成份居多。

我之所以用咁大篇幅去寫下自己嘅失敗，就係要令自己去面對佢，比個種痛心嘅感覺去警戒自己係投資技巧上仲係好幼稚，仲有好多好多嘢要學，好多缺點要去修正，同時間亦都係自己2011年嘅改善目標：

• 資金管理 --- 何時攻擊，何時防守；
• 選股思維 --- 國策、經濟前景等；(向會計仔、new sir、cup 兄、柴娃娃兄、味皇、維斯兄等作為參巧)
• 溝貨、賣出技巧；
• 企業調研方法 --- 除實際數字外，要多點想像力去參透背後嘅信息
• 市場資訊過濾、吸收技巧 --- (向偉哥、clcheung兄、藍bing兄請教)
• 加強本身強項 (我覺得係中、長線選股)，減低頻繁交易 (弱點)；
• 戒掉「聽冧巴」，就算係強勢股，一定要經過自己估值才作出投資決定，需知好股票係高價買入都係一個失敗嘅投資。

=============================================

個人篇：

1. 今年身體算叫做好過上年，無乜大病痛，希望來年持續落去；
2. 事業上，平凡得很，沒有特別事情；唯一是仍看不見在呢行嘅前景，有陣時覺得好迷茫，唔知自己可唔可以係呢行發展落去，盤算著是否該轉行，以「過得一日得一日」嘅心態做下去；
3. 宅男一名，感情一片空白；
4. 對於年頭定落嘅目標，一半以上都係空頭支票，唉..........
5. 家庭方面，家母眼睛出現毛病，要時常覆診，以防病情突變；

而家定下來年目標：

• 繼續運動，練大隻；
• 學車 --- 呢個係頭號目標；
• 抽多點時間陪家母，一方面年紀大，另一方面有好多承諾未兌現，另一方面多點與家人溝通，因為真係質同量都不足；
• 對外方面，要維持朋友間聯繫，唔好再咁宅男，擴大關係網；
• 要看清事業目標，不再柴娃娃心態；
• 感情事順其自然，呢d急唔嚟；

Posted in: 事業,投資,生活