危與機並存

工作都幾忙，所以少左時間去理自己嘅投資，只係每日咁吸收資訊，起碼唔會同市場脫節。呢兩個星期實在有太多太多好突然嘅事發生，其實思緒上都有點兒混亂，我嘗試將佢列點再加自己個人觀點。

• 歐盟終於出手，拋出7500歐元方案去拯救希臘，避免因為希臘事件令到歐元區陷入系統性危機。但這變相嘅量化寛鬆政策(包括以債養債，同買入歐豬五國國債)，令到歐元兌所有貨幣下跌，對沖基金利用這個機會試圖令歐元解體。(歐盟無得唔咁做，歐豬五國國債利率高企，要用高成本借錢，變相令佢地更加易破產，為左避免這情況發生，必須壓低借貸成本。同一時間，歐元下跌，出口貨更有競爭力，希望藉貿易盈餘令經濟增長，但我覺得歐豬其實獲益唔多，反而歐盟入邊嘅德國可以受惠。但咁嘅話，更加會造成德法同南歐國家經濟差距增大，令整個歐盟同歐元制度更加脆弱)
• 黃金創新高，反映投資/機者對fiat system 嘅不信任，認為會面臨高通脹時代。(黃金我真係唔識睇，究竟會係各項投資產品下跌下佢係唯一升嘅，定係同一命運呢？)
• 美國對金融業嘅態度強硬(刑事檢控、加強監管)，令投資者遠離金融類股份。(若真的落實有關方案，必會令金融類股份盈利有負面影响，令好似好平嘅美股可能變得好貴，就算影响不大，投資者都會形成類似睇法，從而調整美股估值)
• 中國方面，四月份宏觀經濟數據顯示出中國增長勢頭不錯，但通脹預期、呆壞賬、銀行融資、產地產打壓消息下，股市未能夠反映經濟。(但細心一想，是否有一些數據顯示中國經濟硬着陸而我地未能發覺呢？因為a股己於上年八月見頂，到今個月為止己經九個月，而股市一般來說係有效率，無理由會錯價咁耐。)
• 港股方面，好有性格。當所有人以為佢會升時，編編升唔多/跌；當美股暴跌一千點之後個日，人人以為佢會跌好多時，佢又好有性格咁係咁而跌兩三舊交下數。(咁嘅情況下，個人投資者對於後市真係睇唔清，日升日跌又無路捉，比佢玩死！)而且，資金繼續炒二、三線股份，而上年被受追捧嘅熱門股(家電、汽車，體育、食品內需等)反而無資金流入，好多都受制於上年十一月嘅頂位。相反，通訊設備、科技同醫藥升極都有。(因為小弟倉中好少這類版塊，所以未能享受升幅，原因是太貴)
• 樓市方面，美國繼供個案增加中，但售價中位數已經唔大跌，有回升之勢，對於美國房屋市場係好。而內地樓市太火，政府出硬招都只係令到成交量下跌，但樓價仲係係高位徘徊。(但我相信內地樓價始終會下跌，下跌幾多視乎中國政府個手段有幾強硬同中國經濟增長勢頭而定，好難話幾多)。香港方面，所謂嘅九招十二式，都係擺下款咁話比發展商知唔好咁大貪，另外話比港人知政府係有做嘢。(成效方面，心理大於實際，始終供求先係主要因素)

對於目前市況，我係編好嘅，短期仍然會因為歐豬問題而受困，但中期我認為經濟已經有起息，股市會隨着反映。至於幾時起動，好睇阿爺。

Posted in: 投資,經濟