八十後談八十後

呢排「八十後」實在太heat，自己都係呢一代嘅人，唔多唔少都會明白佢地而家嘅感受。自己之前(都唔係好耐之前)都好似一般嘅八十後(自己算叫做幸運嘅一群，算叫做有個degree)，會去埋怨社會上無足夠機會比自己上位(我心目中上位嘅意思係做到一間公司嘅管理層或者自己做老闆)，而學歷嘅普遍性令到就算大學畢業生都係攞緊七八千蚊嘅人工，有的甚至乎畢左業成幾個月都仲係求職中。

時代變左，環境亦在變。作為外向型經濟體，香港無可避免會受到外圍經濟嘅影响，呢十年嚟，股市、樓市都經歷左大上大落期，而唔少八十後都係呢個時期踏入社會，經濟嘅起落對於一無所有(有的甚至「咩」住政府債)嘅社會新生嚟講，無疑會加重左佢地嘅心理負擔。再加上香港政府嘅施政態度，令到財富更集中係富人當中，相對上發達越嚟越難。係全球化之下，競爭唔止嚟自本土，仲係嚟自全世界(主要為中國)，供多於求之下，便造成今日嘅局面。

是否物質豐富左，或是我們呢一代係相對好環境中及父母呵護下長大，年輕人失去左係困境中掙巴求存嘅意志；而社會埋怨氣氛日漸濃厚之下，開始只懂指責其他人同事，將問題由自身拋到去社會、體制、環境、上一代等中，當然有當中會是間唔中發下勞騷，但都有相當部分會因而放「pair」，吸毒、隱青悠然而生。

講下自己嘅情況，可能個人性格偏向默守成規，對於上一代人設下嘅路線圖無咩爭議，由細到大都認為要發達係靠份好pay嘅工，再加上儲蓄而成，所以中學同大學都好努去讀書，同學去玩嘅時候，我就讀書同做題目，可以講係香港教育制度下嘅標準產出，對於考試，書有嘅九成識，書無嘅九成唔識。畢業時份成績表幾靚(學歷個part)，見工都有唔少機會。但做下做下，就發覺自己做嚟做去都係散仔一名，唔似同期嘅朋友仔咁，個個都有自己嘅目標，向著佢地嘅目標奮鬥，相反自己好似漫無目的咁係呢個社會上生存一樣，浮下浮下，只懂努力咁去游，到頭來可能游嚟游去都游唔到去彼岸，浪費左時間同心力。雖則自己都不斷咁想諗想點樣去改變呢個困局，但我到呢一刻為止都未搵到，只能夠講句見步行步。

我曾經都有一段好灰嘅時期，覺得前路茫茫，無發展機會，同今時今日嘅八十後都有相同嘅感受。環境唔同左，人亦自然要變，起碼唔係變得更差，知道自己唔係咩打破傳統嘅材料，無本事去創新路，唯有轉而求其次，諗方法點樣係呢個社會上搵到自己嘅價值。好多人都會進修，我呢？係未搵到自己嘅興趣或長處之前，我應該唔會去比錢去進修(自修另計)，若果係為左進修(沙紙)而進修，我覺得太浪費，比你有十幾廿張炒紙都好，但當中無一樣係你嘅興趣所在，比你做到相關嘅工作或升職嘅話，成績好極有限。況且，唔少成功人仕嘅經歷都指出學歷並非如外界中所講得咁重要，可能入門容易左，但去唔去到終點係好睇個人係過程中比左幾多心機、時間、努力，俗語都有話：「後發先至」。你可能有千百萬個理由去反駁我，但我嘅想法就是這樣。

亦都如上所說，雖則我唔去玩轉上一代設下嘅路，但我可以選擇唔去遵從，一切由心出發。

Posted in: 生活