性格

1。 當打左工一段時間，好容易會諗左去轉工，轉工原因唔係可能公司有問題，根本原因係自己性格，唔可以係同一岡位上面待得太耐。開始時因為好多東西需要學習同跟進，令到自己有種原動力去了解公司、工作上嘅一切，務求令到自己係最短時間入邊適應公司同工作上嘅需求。當一段時間之後，由於工作模式大致上已有一種諗法，對於新TASK都唔會離開呢個區間太多，對於人地派落嚟嘅工作會照一種模式咁去完成，慢慢變成一種習慣，繼而開始會失去原動力，即俗稱嘅悶！到左呢一個階段，因為係公司年資短，唔會有太多可能性升職，求嘅可能係每年係薪金上嘅調整。公司方面，亦都唔會有太大嘅轉變，令到自己手頭上嘅工作都唔會有咩新嘗試。呢個亦都係唔同人係唔同工種都需要面對嘅感覺／景況，而我會選擇去變。性格使然，又或者太天真咁去諗，自己應該去做一D有轉變而有挑戰性嘅工種，但係個FREQUENCY同難度又唔可以太過火（又要馬兒跑、又要馬兒不吃草），自己講出嚟都覺得膠（唔知有無形容錯）！世界上邊有咁嘅工，其實工作性質已經定左，打工仔需要做嘅係點樣去符合佢嘅需要／求，簡單兩個字 －－－ 適應！

2。 基於以上天真嘅想法，所以攪到自己份RESUME都幾難睇！每份工嘅時間都大約係年半到！對於初入職者，時間上根本唔夠一個人去了解公司、了解所有工作上嘅嘢。想升職，首要條件係你要證明到自己比上司睇你係值得升嘅，能力係其中之一，而時間到係一個重要嘅考慮因素！但正如自己所講，正正係呢種性格阻礙左升職嘅希望，咁短時間根本唔可能比到足夠理由上司話你係抵升，況且我又係OUTPERFORMER，時間同能力都唔能夠說服公司其他人覺得你係值得呢個機會，咁到最後薪公當然都係慢慢咁調整下咁！

3。 好，到最重要嘅嘢！我講過，我好睇重錢！既然升職係需要時間上嘅因素，自己性格又唔種意太刻板嘅工作方式，好容易就會諗不如轉工！薪金係一大考慮因素。所以四年以嚟，自己都係散仔一名（JUNIOR），若果以同一時間計算，待在同一公司應該升左（普遍嚟睇），薪金可能差無幾！但係RESUME方面己經輸左一大截。HR其實都好睇一個人嘅穩定性，若果一個能力強但穩定性唔高嘅人同一個能力中庸但穩定性高嘅人比HR去考慮，後者係會有優勢，因為能力可以改善，但性格係天生，難以改變！

4。 自己都睇到問題，亦都知道要變，但搵唔到方法。我自己係一個叫做固執嘅人，性格更加係好難改，我其實唔知究竟需要點做先可以係一份工上面STAY得而一點（例如三、四年）！

5. 而家做緊Software Engineer，工作範圍其實係寫寫寫PROGRAM，除除除錯，每日如是，若果唔係好有HEART係呢方面發展，就好容易好似我咁，覺得好悶旦。但可以點呢？改變工作模式？點改？改咩？唔同電腦，同手？轉行？又唔舍得從頭嚟過？最尾都係去到轉工一途，亦都出現左現況！

Posted in: 事業