見紅了

睇翻篇四月回顧，真係想搵窿捐。五月一日已經係五月最高點，之後跌多過升(16:6)，瓜多過菜，組合也見紅了。

歐債都講左兩年，但就鑊鑊新鮮鑊鑊金，希臘單野搞到成個世界人心惶惶，搞到資金可以比息泊入短期德債都唔想買跌到殘嘅股票，太反常啦。六月嘅改選會好影響其餘四隻豬嘅取態，繼而股、匯、債、金銀等都會跟隨大變，似乎係知道結果前渣CASH係一個最佳嘅選擇。(但我仲係七十五百仙持股)

中國呢... 三頭馬都唔掂，阿爺知道四年前大用力，而家就住就住咁鞭幾下，有反應嘅咪收下手，無反應嘅咪連口都出埋，總之唔想太過激，到時車毀人亡就唔好。

香港呢... 布就剪左，跟住想「洪洪聲」咁通過個架構改組建議，點知有少少阻滯，唯有寫下幾萬字做下宣傳，話唔改組做唔到野，太極功夫真係一流。可能見到老曾呢排幾得閒，咪再提醒各位市民老曾姓貪，順手轉移下視線，一舉兩得，何樂而不為！又又，房協賣樓，餓樓嘅市民就落定飛仔，怕「蘇州過後無艇搭」。話之你係堅抵定假抵，有做野總好過唔做野麻。

五月都已經咁窮，六月係咪絕到連條横底唔留翻比我呢？但我唔想裸泳喎，都係係淺水位置玩下堆沙好，玩翻半個月睇下有無事先游深少少似乎係一個唔錯嘅選擇。

Posted in: 吹水,投資,經濟