Policy Address

施政報告出台，各界都爭相去評論呢份報告，議員永遠都會抽水(對，我係對d議員有bias)，又話呢樣做得唔夠，又話個樣著墨不多，但係永遠有彈無讚；各界都會由自己角度去睇呢份報告，你我都係，所以所有嘅評論始終唔會客觀。以下係我主觀感覺：

樓市：
1. 置安心計劃：一早放左風出嚟，先租後買，五年後以市價回贈五成租金幫助置業，效果有幾大？
我計一計(讀數係鐘意量化)，市值租金中位數九千，五年後一半即廿七萬，三巴仙通賬，等於今日嘅廿三萬，九成借貸可以買二百五十萬嘅樓。
都ok，有d心動。不過要睇清詳情，既然要回贈一半，即收左租後，一半會落去個pool度，咁究竟個pool點運作呢？點樣去監察佢呢？
其實除左呢個置安心，係唔係可以研究下singapore嘅做法？利用強積金嘅供款去還所借嘅貸款呢？
有人會質疑咁咪違背左mpf嘅原意，令到打工仔無左筆錢嚟退休？咁點解唔用逆按揭？
2. 發水樓：一早應該用實用面積；但我更著意嘅係政府對機密資料嘅保護性有幾高！點解咁講，其實除左實用面積外，地面以上嘅設施(停車場、會所)唔會獲得豁免；同一時間，前一兩個月，各發展商都折售停車場，會唔會咁啱呢？呢點都好耐人尋味......
3. 投資移民，心理及安撫作用，實際可能幫唔到太多，唔係人地錢多，係d銀紙太cheap。
4. 供應話就話每年有兩萬，但都係脫離唔到勾地呢個制度，主動權都喺係各大發展商手中。

扶貧：
1. 關愛基金：我覺得美其名為扶貧，實際為減低仇富/商心態。
2. 車船準貼、最低工資、最高工時都係頭痛醫頭、腳痛醫腳嘅方法，治標而不治本，但仲好過無反應。
3. 至於幫清貧學生嘅書薄準貼，出發點係好。但唔好唔記得新學生(中一)買書成四五千蚊，舊學生都要二三千蚊，問題其實好復雜，我覺得除左係「下游」加資助外，可以諗下係「上游」度控制書商改版同加價嘅倩況。
4. 高齡社會引申出嚟嘅問題牽涉廣泛，一嚟加重社會負擔，二嚟整體競爭力走下坡，呢樣係發達國都要面對嘅問題，報告入邊都睇到呢樣嘢，我覺得政府己做左佢可以做嘅事。

經濟：
1. 十大基建 + 六大產業 --- 兩段講完，之後主力四大支柱，咁即係點？
2. 金融創新，呢樣係必要，但必須條件係有個完善嘅鑑控制度。

保育、環境：
1. 可以睇到係有心去做，唔錯。

教育：
1. 加學位，加資助。當然，智識型經濟之下，加強教育投資係好，但有無足夠工種去吸納多出嚟嘅勞動力？學士、碩士量化而工種嘅斷層好可能加深經濟發展嘅傾斜特性。

整體嚟講，成份係回應社會所求，邊樣社會回響大嘅著墨多d，之後嘅都係點到即止。

Posted in: 吹水