做燈

上個星期買入招商銀行，點知近乎模頂。

buy @ 19.38 but close @ 19.00 

今日買入雨潤，都係差唔多最高價。

buy @ 21.6 but close @ 21.25 

最新消息，阿爺同我地拜早年，首先比個大禮先：由25/02/2010開始生效，存款準備金率上調五十點子。 

待續.......

過左兩個禮拜啦，上調存款準備金同美聯署上調discount window率，都對於市場唔係造成太大嘅震動，係咪市場搵到支持呢？


睇翻以上操作：
招行收市價為19.12，仲未浮上水面，但係供股詳情出左(係差供股價)，消除左其中一個負面因素，而家睇第一季業績先知仲可唔可以更上一層樓。


雨潤收市價為23.1，有賺。呢次係小弟第一次用新技術走勢去買股，透過圖表確定有上升趨勢之股票，再以基本因素決定係入貨與否，希望可以有所得著。


近排少左出文，因為自己對於市場太過睇唔通，而消息嘅氾濫程度同傳言主導大市，所以都係以觀察為主。有幾點想法想提出：

1. 滙市大翻天：希臘或者「歐豬」嘅財困顯露出歐盟同歐元嘅弱點，市場嘅大炒家就以呢個為攻擊點，以史無前例嘅沽空額對於歐元。但近日就算多左不利嘅消息，而美元指數再想創一年新高之際，歐元反而尋找到支持。同一時間，同病相連嘅英國同英鎊就好似食左瀉藥咁。對於呢個情況，應該係市場炒家嘅新攻擊點係英鎊，而估計歐元會有一個像樣嘅反彈；既然推唔落，反手挾淡，再追擊英鎊，實行食兩家茶禮(有點九十年代SOROS嘅FEEL)。同一時間，我斷估下一被相中嘅貨幣會係YEN。近日因年結同避因素，令到佢兌美元徘徊係88-90之間，究竟佢會唔會如羅+聰所言咁會升到45呢？我就同佢打對台，認為佢有回落嘅誘因！
2. 港股無咩好講，因為太有性格，太飄忽，好難預估佢係升定跌，但相信係進入左上下震盪、炒股唔炒市階段，下一步要看咩消息會令大市以大成交上衝/下衝臨界點才會有進一步方向。而股票選擇方面，相信下一個焦點會係第一季業績，而自己中期睇好嘅版塊會係內銀、內房、食品同原油(NUMBER唔講啦，有心嘅會自己做功課，況且我咁燈，費時累人)。美股都係日升日跌，不過似乎係一萬零二百點搵到支持，但係就比一萬零五百點壓住，資金選擇界別轉換，應該係各基金對於第二季嘅步署。之於亞爺，雖然虎年開黑盤，但今週都叫做做翻紅盤，係三千點以上收市。而兩會同第一季業績公佈前席，市場都係觀望；但見到成交額開始大，可能係醒目資金偷步入市，炒兩會行情同業績火紅。
3. 宏觀方面，新興國都開始收緊資金供應，除左因為經濟開始回復常態，仲有另一個因素：通脹！基於擁有健康嘅資產負債表，新興各國都唔需要面對減倩；另一方面，歐美等發達國經濟前景相比之下實在係差，去年巨額投入市場嘅救市資金便順理成章咁流入新與國。東炒西炒之下，無論商品、股市、樓市都有非比尋常嘅上升，從而產生出通脹預期。自己愚見認為今年年尾通脹會抬頭，為左壓抑呢種趨勢，各新興國都開始做嘢，慎防07年個種失控情況再出現。
4. 香港樓市方面，有人話有泡，有人話無泡，我呢？以一個未上車嘅八十後嚟睇，當然係有泡！但會唔會爆係另一件事。每一場泡沫嘅爆破都係隨著「煙花」行情嘅落幕而出現，至少我現在感覺唔到那燦爛一刻嘅來臨。政府嘅保護態度、北水、資金成本低等呢D刺激之下，應該仲有一段時間先會進入高潮。至於我會唔會買樓？會，但係唔係呢一刻，至少回報同風險不成比例，買股好似贏面高D。至於有實際需要，其實樓價嘅上上落落都係賬面上嘅嘢，買入嚟住都唔會諗住賣翻出去(除非樓換樓)，咁幾時買都得，最緊面係資金管理，若而家都要以人工四成以上去供樓嘅話，就要三思，因為息率嘅上升會對於供樓負擔好大影響。

Posted in: 經濟