Comment

唔覺唔覺，2009年又過左一季，如果淨係睇上星期四恒指同今年年初嘅恒指做對比嘅話，好似原地踏步，殊不知原來經歷左幾次過山車！

 

上個月開始，中、美兩國嘅經濟數據都有d向好嘅趨勢，美國有新屋銷售、新屋動工；中國有採購經理指數、貨幣供應、出口/入口數據；當然少不了嘅係股市。夾係兩者影响之間嘅港股就進入選股不選市期，好多股(資源、中國零售、建築等)都升左一、兩倍以上，若果功力係有嘅話，呢一季都幾和味下。耐何小弟仲係個種只想不行動之人，亦都對自己信心唔夠，捉唔到呢次機會，白眼看著眾多blog友佢地嘅成績而乾着急。

 

睇翻佢地嘅成績，每一次都有點衝動去買/入市，呢d就係散戶指數、又或者羊群心理。到呢一刻為止，股票佔自己個人財富大約三成多，若果計埋mpf 同基金嘅話，會提升到五成多點，其餘係cash。呢幾日放假，我都係度諗緊下一步嘅資產配置。現市況，我真係睇唔清，好淡雙方都有佢地嘅理據，相對我嘅有限知識，要從中參透而作出決定係幾難，莫非呢段時期係道氏理論入面「牛一係懷疑中誕生」嘅時間？

 

自己算係貪心嘅人(睇我組合就知)，每樣嘢都想有d，唔得集中，呢排研究緊下一論牛市嘅十倍股，又或者咁講，下一論牛市嘅領導行業。但係實在太多，分辨唔到，亦都無咁多時間去做詳細分析，都唔知點算好，係唔係應該離開個市場一段時間，重新去思考、讓自己心靈清晰點呢？

 

若果眾人有咩意見，不彷提出，雖然小弟嘅blog知名度非常低，亦都無話有咩驚天地、泣鬼神嘅偉論，亦都希望路過嘅都比些少見解，扶持下我呢一個迷失方向嘅小羊！謝謝