Saturday, June 11, 2011

很久不見

唔經唔覺都無寫blog成個月,一嚟自己懶,二嚟又無乜野想發表,所以索性休息下。

係股市上,五窮已經實現左,暫時來說,六絕亦都上演中,咁會唔會七翻身呢?我無水晶球,唔知下一秒會發生d咩;可能聽日香港地震,港股無運行兼踏入熊市;又或者阿爺話直通車通行,進入牛三又唔知,所以都係顧掂自己手上投資組合,預定唔同市況嘅對應策略;我呢,最差咪集體跳車 --- 清倉止蝕。

呢期我唔想講太多股市,因為人為因素實在太大,我呢一刻嘅睇法可能隔多兩日又唔同哂,反而我想講樓市多一點。

人類對待資產(股票、樓宇等)同普通物品有兩種不同嘅態度,前者越平越無人要、越貴就搶,後者郤相反;前者可以諗都唔諗就一大舊錢買、買、買,後者可能為左個一個幾毫去斤斤計較。

而家樓市同股市就反映緊以上第一種特性:

  • 樓市升到ba ba 聲,好明顯同收入唔匹配,但偏偏就越多人去參與呢個接火捧遊戲;
  • 另一邊廂,股市平到無人要,P/E < 10,息率 > 5% 嘅股票好多郤無人問津;
若然對樓市有跟進嘅人,其實已經睇得出支撐樓市上升嘅catalyst係慢慢無效化:
  • 極低息不再:h plan 同 p plan 嘅息差收窄,利息大約維持於2.5 - 3 %不等;
  • 供不應求開始有變化:政府主動推地、發展商積極推盤,供應續年回升;隨投資需求外,實質需求變化不大;
  • 北水倒流:內地收水,北水流入量減少,甚至要借港紙回內地,有逆流傾向;
  • 供樓負擔上升中:以較平均息率低而計出的負擔比率介乎40-50%,係壓力測試下,比率回升至60-70%無難度;
  • 最重要的是,樓宇的兩極化 + 樓價與收入脫節,可以講上升嘅「基礎」因素越來越虛,現在等的是「駱駝最後一根稻草」;
還有記性的話,上年11月推出的SSD令樓市至今處於有價無市/乾升的狀態,睇住1200便知;另外,地產股(1,101,16,12等)都同樓市背馳,究竟係股與樓decoupling?或是股先反映樓市前景?定係樓市反客為主,帶動地產股突破?

呢個問題嘅答案至少值幾間「豪」宅,我知道的話就唔駛仲係度dup石仔了!

當然,以我呢個無殼蝸牛來說樓市,的而且確有偏見,我只不過是想提一提現在的風險,希望上車人士有一個全盤考慮才入市,不要因為「人有我有」而忽略當中風險。





 
Design by Free WordPress Themes | Bloggerized by Lasantha - Premium Blogger Themes | Best Web Hosting